Twittear

DOWNLOAD  MANIAC MANSION DELUXE - Version 1.4 - EXE - Windows 7 & XP

DOWNLOAD  MANIAC MANSION DELUXE - Version 1.4 - ZIP - Windows 10 & 8

 

Pri Maniac Mansion Deluxe

Kelkaj strangaj personoj vivas en la Freneza Domo: D-ro Fred, "emerita" klinikisto kiu fariĝis freneza sciencisto; Flegistino Edna, iama sanigistino kies ŝatokupoj ruĝigus eĉ maristojn; Strang Ed, militama junulo kun fetiĉo pri hamstroj; kaj estas ankoraŭ Eks Kuzo Ted, kaj la Tentakloj, kaj iu - aŭ io - alia... Kaj kion faras dolĉa kaj juna teamknabino nomata Sandi en la kelo de D-ro Fred?

Via celo estas gvidi skipon de tri lokaj studentoj (inkluzive de la amindumanto de Sandi, Dejv) tra la domego por la liberigo de Sandi. Preter via esplorado, vi renkontos ĉiujn strangajn loĝantojn de la domo, kaj vi ekscios ke la ambicio de D-ro Fred estas regi la mondon - junulon post junulo.

Vi eltrovos ke ĉiu el la sep elekteblaj junuloj havas specialajn lertojn, talentojn, kaj malfortojn. Kaj ĉiu el la frenezaj loĝantoj de la domo havas celojn kaj dezirojn kiuj povos helpi aŭ bloki vian skipon, depende de kiel vi rilatas al ili. La historio - kaj via alirmaniero por savi Sandi - estos malsamaj laŭ la knaboj kiujn vi elektas kaj kiel vi interagas kun la personoj kaj aĵoj en la domego mem.

Ĉiu el la eblaj historioj en Maniac Mansion temas ververe pri granda, malsimpla puzlo konsistanta el grupoj da malgrandaj enigmoj. De tempo al tempo, filmecaj "interscenoj" liveras indikojn pri la historio kaj tio, kio okazas aliloke. Dum vi eltrovas la pli etajn enigmojn kiuj konsistigas ĉiun historieron, vi konstatos ke la plimulto estas nepre solvenda laŭ certa ordo. Estas ĉiam pluraj kieloj por ion plenumi - sed evidente, ĉiam ekzistas iu plej bona maniero. Bonŝancon!

La ludo

La unua afero kiun vi vidos post la ekrulo estas la titola ekrano kun la portretoj de sep junuloj, el kiuj vi povas formi vian teamon. Por alselekti vian triopon, uzu la muson por movi la montrokrucon sur la portretojn de la junuloj kaj klaku sur unu kiu interesas vin. Vi vidos etan priskribon de la selektita knabo ĉe la ekrana malsupro.

Dejv (la amato de Sandi) ĉiam estas ano de via skipo, kaj tial vi elektu du aliajn junulojn. La du unuaj portretoj kiujn vi surklakas estos ĉirkaŭitaj de blanka kadro, kiel tiu ĉirkaŭ Dejv. Ĝi signifas ke la rolulo de la koncerna portreto estas elektita por la skipo. Se vi deziras ŝanĝi vian elekton, simple klaku denove sur la bildo de la knabo pri kiu vi rezignas. La kadro malaperos kaj vi povos elekti alian.

Vi povas venki la ludon per ajna skipo, sed la sinsekvo de la historio kaj multaj enigmoj solvotaj estos malsamaj laŭ la kombino. Kiam vi finis la elektadon, klaku sur "Start" por komenci la ludon.

Post la enkonduka filmeto, vi vidos vian skipon babilanta surstrate antaŭ la enirvojo al la domego. Kiam ili ĉiuj turniĝas kaj ekrigardas al vi, tiam vi same ekregas la agojn de Dejv (eblas ankaŭ ŝanĝi al la regado de la aliaj junuloj per la portretoj ĉe angulo de la fenestro).

La Rolfenestro konsistas el la plej granda parto de la ekrano kaj en ĝi estas montrata la animita mondo de la ludo. Ĝin oni spektas laŭ "kameraa vidpunkto" de la ĉambro en kiu estas la rolulo aktiva en la momento.

La Verboj por la agoj estas elektendaj el tiuj ordigitaj laŭ kolumnoj sub la linio por frazokonstruo. Vi ĉiam vidos ĉiujn verbojn uzeblajn - ili ne ŝanĝiĝos laŭlonge de la ludo. Por selekti verbon, simple loku la indikilon sur tiu dezirata kaj musklaku.

La Inventaro troviĝas en la ekranparto apud la verboj. Ĉiu membro de via skipo havas sian propran inventaron. Ĝi estas malplena je la komenco de la ludo; objektoj estas aldonitaj en la inventaron de rolulo kiam tiu ĉi deprenas ion el la scenejo dum la ludado. Ne ekzistas limo rilate al la nombro de objektoj porteblaj. Kiam estas pli ol ses eroj en ies inventaro, rulsagoj aperas en la mezo de la listo. Uzu ilin por videbligi la aliajn erojn.

Interscenoj estas mallongaj, animitaj filmetoj - kvazaŭ scenoj el filmo mem - kiuj eventuale provizas al vi indikojn kaj informojn pri la roluloj kaj okazaĵoj. Dum spektado de intersceno ne eblas regi la agojn, kaj pro tio la teksto sub la rolfenestro malaperas.

Klavaraj komandoj - Ĉiuj verboj uzataj en la ludo povas ankaŭ esti selektitaj per klavaraj komandoj. Ĉiu literklavo en la maldekstra parto de klavaro QWERTY rilatas al unu verbo. Unufoja premo de la ĝusta klavo egalas al la movo de la indikilo sur la verbon kaj ekklako. La klavoj estas ordigitaj laŭ la sama aranĝo de la verboj en la ekrano.

Q - Donu    W - Malfermu   E - Uzu
A - Prenu    S - Rigardu       D - Puŝu
Z - Fermu    X - Parolu         C - Tiru


Specialaj klavoj

Por ŝanĝi la regadon de unu rolulo al alia, klaku sur la portretoj. Kiel pli rapida alternativo, vi povas uzi funkciklavojn por ŝanĝi la aktivan junulon. [F1], [F2] kaj [F3] koncernas la tri junulojn de via skipo.

Por konservi vian progreson en la ludo, tiel ke vi povu malŝalti la komputilon kaj rekomenci ĝin poste en la sama loko, uzu la rimedon "Konservu". Atentu ke "Konservu" tamen ne funkcias dum interscenoj. Simple premu la funkciklavon [F5] (konservu/rememoru ludon) kaj sekvu la surekranajn instrukciojn.

Por rememori ludon kiun vi konservis, same uzu la funkciklavon [F5] (konservu/rememoru ludon) kaj sekvu la surekranajn instrukciojn.

Por preterlasi interscenon, uzu la dekstran musbutonon aŭ la Esc-klavon. Kiam vi estos ludinta Maniac Mansion Deluxe plurajn fojojn, vi eble deziros uzi tiun rimedon por transsalti scenojn kiujn vi jam spektis.

Por rekomenci la ludon ekde la unua sceno, premu la klavon [F8].

Por fari paŭzon, premu la spacoklavon. Premu ĝin denove por ludi plu.

Resumo de la klavaraj komandoj
Ŝanĝu al Dejv..............................................[F1]
Ŝanĝu al la dua knabo................................[F2]
Ŝanĝu al la tria knabo.................................[F3]
Konservu / Rememoru ludon....................[F5]
Preterlasu interscenon...............................[ESC] aŭ la dekstra musbutono
Rekomencu la ludon...................................[F8]
Paŭzigu la ludon..........................................[spacoklavo]
Eliru la ludon................................................[Ctrl-C]


Noto pri la Esperanta versio

Pro la strukturo laŭ kiu la objektonomoj estas traktataj en la ludo, dekomence farita nur por la angla lingvo, ne estis eble enmeti la akuzativan finaĵon en la frazoj de la komandlinio. La objektonomoj estas nedivideblaj, kaj tial, ekzemple, "vitra kruĉo" ne estas ŝanĝebla al "vitraN kruĉoN", ĉar la unua N troviĝas meze de la rekta objekto. La sama problemo okazas pri nomoj kun prepozicioj, kiel "skatolo da laboriloj".

Nu, ĉar nur kelkaj rektaj objektoj unuvortaj glate akceptus la akuzativon, estis preferinde tute ne uzi ĝin en la komandlinio pro kohereco (en la dialogoj, tradukitaj kiel frazoj kaj ne kiel elementoj, la akuzativo evidente ĉeestas). Tio kompreneble NE signifas ajnspecan apologion kontraŭ la uzo de la akuzativo (kiu estas ne nur utila, sed necesa pro la ecoj de nia lingvo), sed simple ke temas pri teknika problemo - same kiel la foja malfacilo por entajpo de supersignitaj literoj pravigas ne la ŝanĝon de la koncernaj lingvoj sed ja la plibonigon aŭ reformuladon de la teknologio, tiel ke ĝi estu internacie uzebla.

La klopodo estis traduki la ludon laŭ kiel eble plej norma Esperanto (se io eventuale estas misa, la kulpo estas ekskluzive de mia ankoraŭ ne perfekta kono), tiel ke ĝi estu bona, lerniga kaj fidinda amuzaĵo ankaŭ por komencantoj. Mi esperas ke vi ĝuos ĝin.

La tradukinto.

2005 LucasFan Games
Versio 1.4